Oʻzbekiston qilichbozlik terma jamoasi Bahrayn poytaxti Manamada boʻlib oʻtgan 23 yoshgacha boʻlganlar o‘rtasidagi Osiyo chempionatini uchta bronza medali bilan yakunladi. Bir hafta davom etgan qitʼa birinchiligida oʻzbekistonlik sportchilar yakka va jamoaviy dasturlarda sovrindor boʻldi.
Yakka bahslardagi bronza medalini rapira yoʻnalishida ishtirok etgan Ulugbek Usmonov qoʻlga kiritdi. Bu natija Oʻzbekiston terma jamoasining musobaqadagi yakka dasturdagi medali boʻldi.
Yana ikki bronza medal shpaga bo‘yicha jamoaviy musobaqalarda qoʻlga kiritildi. Oʻzbekistonning erkaklar va ayollar jamoalari uchinchi oʻrinni egallab, shohsupaga koʻtarildi.
Shunday qilib, Oʻzbekiston terma jamoasi U23 Osiyo chempionatini uchta bronza medali bilan tugatdi. Avvalroq Oʻzbekiston ayollar qilichbozlik terma jamoasi Hindistondagi Osiyo chempionatida jamoaviy sablya bahslarida bronza medalini qoʻlga kiritgani xabar qilingan edi.





