Yandex Search tahlilchilari 11.11, Black Friday va boshqa kuzgi chegirmalar oldidan foydalanuvchilar xizmat orqali qaysi mahsulotlarni izlashini o‘rgandi. Tadqiqotda javoblarida O‘zbekistonda ommabop marketpleyslar va onlayn do‘konlar tilga olingan mahsulotlar hamda saytlar haqidagi anonimlashtirilgan so‘rovlar hisobga olindi.
Elektronika mahsulotlari so‘rovlarning 22 foizini tashkil etib, eng talabgir toifa bo‘ldi. Qurilish va ta’mirlash mahsulotlari 11 foiz bilan ikkinchi o‘rinni egalladi. Avto va moto mahsulotlari, shuningdek kiyim-kechak, poyabzal va aksessuarlar toifalarining har biriga 6,5 foizdan to‘g‘ri kelib, ular uchinchi o‘rinni bo‘lishdi.
Maishiy texnika ham sezilarli qiziqish uyg‘otdi va uning ulushi 6 foizni tashkil etdi. Go‘zallik va salomatlik mahsulotlari, uy uchun mahsulotlar hamda kitoblarning har biri so‘rovlarning 5 foizidan qayd etildi. Bu natijalar qidiruvlar kundalik ehtiyojlar bilan birga uy-ro‘zg‘or va bo‘sh vaqtga oid mahsulotlarni ham qamrab olganini ko‘rsatadi.
Ko‘p hollarda, ya’ni so‘rovlarning 83 foizida foydalanuvchilar nimani qidirayotganini aniq bilib, mahsulot nomi yoki tavsifi orqali izlaydi. Misollar orasida “iphone 18 pro 512 г” va “зеркало с подсветкой” so‘rovlari bor. So‘rovlarning 10 foizida esa foydalanuvchilar mahsulotning o‘zidan ko‘ra do‘konlar va ularning kataloglariga qiziqqan; bu avval mos platformani topib, keyin mahsulotni tanlash istagi bilan bog‘liq bo‘lishi mumkin.
Foydalanuvchilar sovg‘a g‘oyalari, brendlar, chegirmalar, shuningdek do‘konlar va xizmatlar faoliyati haqida ham so‘rov yuborgan. “tugilgan kun uchun sovg alar”, “garmin”, “promokod uzum market” va “uzum market uzbekistan telefon raqami” shunday misollar sirasiga kiradi. So‘rovlarning 3 foizida mahsulotni tanlash, taqqoslash, xususiyatlari va undan foydalanish yuzasidan savollar berilgan; “s26 ultra ranglari”, “telefonini smarttelevizorga ulash” va “artel afb300 инструкция” bunga misol bo‘ldi.




